Egia esan, lehenengoaren data begiratutakoan sustoa hartu dut eta denbora hegan doala konturatu naiz, erlojuari hegoak atera balitzaio bezala. Bost urte pasa dira, eta gehienetan –ez beti– euskarari lotutako gaiez aritu naiz. Hori iruditzen zait dela nire papera. Hor iruditzen zait egin dezakedala ekarpena. Dena den, euskararen soziolinguistikan tesia egiten ari naizen honetan, uste dut ez dudala inoiz zutabe hau nire ezagutza mugatua dibulgatzeko erabili. Horren ordez, iritzietan eta hausnarketetan oinarritu naiz. Eta zenbat iritzi, zenbat gai… zeri buruz idatzi dudan ere ahaztu zait jada. Pentsa, gai eta iritziren bat errepikatu egin dudala ohartu nintzen aurrekoan!
Horregatik, irakurle, noizean behin iritziak edota hausnarketak partekatzen jarraitu nahi dudan arren, iritzi hauek ezagutzaren dibulgazioarekin tartekatzea polita izan daitekeela pentsatu dut, eta hala egiten saiatuko naiz. Zer iruditzen, irakurle, prest zaude nire iritziez gain, doktorego tesi ibilbidean ikasten ari naizena ere ezagutzeko?