Argi geratu zen konpartsaren eragina eta balioa: haur eta helduak, bertakoak eta kanpotik etorriak, guraso gazteak etxeko txikiak sorbalda gainean zeramatzela, aitona-amonak bilobekin, mugikortasun mugak zituzten adinekoak... denak batera bildu ziren kaleetan, musikaren erritmoan eta erraldoien koreografiez gozatzeko. Konpartsa honek, txistulari eta gaitero taldeekin batera, herritar oso anitz eta heterogeneoa erakartzea eta poztu egitea lortzen du, belaunaldi eta jatorri guztietako jendea elkartuz.
Askotan oharkabean geratzen da zenbat ordu, entsaio eta sakrifizio egon diren erraldoi eta buruhandi bakoitza kalera ateratzerakoan. Lan isila horren ondorio da du gaur egun ikusleen irribarreak pizten dituena, eta horregatik, ezinbestekoa da eskerrak ematea egun konpartsan ari diren kideei eta baita azken 40 urteotan bertatik igaro direnei ere. Haien dedikaziorik gabe ez genuke gaur egun dugun altxor kulturala izango.
Berezia izan zen etorkizuneko konpartsa nola datorren ikustea: neska-mutil gaztetxoak, gogotsu eta indartsu, prest daude erraldoiak eta buruhandiak beste hamarkada askotan zehar herriko kaleetan dantzan jartzeko. Konpartsaren etorkizuna ziurtatuta dago, ilusioz eta eskuzabaltasunez. Gaurko San Joan bezperako gauan berriz ere gozatuko dugu zuekin eta herriko dantzari eta musikariekin. Bihotz-bihotzez, zorionak eta mila esker egindako lan guztiengatik. Gora Arrasateko erraldoi eta buruhandien konpartsa! Gora gure herriko kultura bizia!