Urtarrilean, eta bereziki otsailean, zetorrenaren berri bazen. Ukatzea tranpa da. Beharrezko bitartekoak prestatzeko: arnasgailuak, maskarak, jantziak, testa, PCRak… egitea. Gure aditu eta politikako jendea non egon da? Konfinamenduak hausnarketara murgildu gaitu. Puntu emaileak, irratia eta telebista: hildakoak, kutsatuak, ospitalizatuak, sendatuak, positiboak… Hausnarketak pertsonen ahulezia agerian jarri du. "Ezereza gaituk", entzuten da. Eta errematea, egoera sozial eta ekonomiko larria. Autoen ekoizpena, lurpera. Bizikletak, zorionez, hirukoiztu egin dira. Bizitzan, molde berrietara egokituko ote gara? Edo betiko leloan jarraituko dugu?
Baina orain, baloiaren txanda da! Futbola, egunero! Puf! Gauza kuriosoa da: segalaritza naturaren erdigunean, zelai zabalean, birusa kutsatzeko arriskurik ez, eta antolatzeko kuadrillak auzolanean. Belarra mardula, 12 segalari prest gogo biziarekin, baina txapelketak galarazi. Zangoak lepo gainean.
