Elkarrizketa pribatua izan omen zuen Sanchezekin eta Gobernua aukeratzeko hirugarrengo honetan abstentziora joko zuela PPri gobernua ahalbideratzeko esan omen zion. Beno, ba, Sanchezek engainatu eta traizioa egin diola dio Gonzalezek. Begira honek, OTANen, gauza bat esan eta beste bat eginaz sartuak izan ginen. Beste bat, Nafarroa Euskadi dela eta Euskadik bere askatasuna lortzeko eskubidea duela esaten zuen. Gogoan dut, Estatuan, duela 36 bat urte, hauteskunde kanpaina tarteko, Bilboko Ercilla Hotelean prentsaurrekoa eskaini zuela, eta Egin egunkarirako informazioa jasotzen bertan ginen. Kazetariz gainezka aretoa eta galdetu nion: “Baieztapen bi horiek defendatzen jarraitzen al duzu?” Bere erantzuna, ohiko aspergarri jarduna bota ondoren, hauxe izan zen: “¿Se ha entendido?”. “Perfectamente. Navarra seguirá igual y Euskadi también según usted”, erantzun nion. Sahara, albora begiratu eta hor konpon! Horrela, traizioz beteriko zerrenda osatuko genuke.
Une korapilatsua bizi du P(SO)Ek. Azken zortzi urteetan 6.000.000 boto emaile galdu ditu. S eta O hizkiak galtzen joan den heinean jarraitzaileen bizkar ematea etengabea eta mingarria izaten ari da. Itsumustuan erori da P(SO)E.
Orain zer egingo duen garbi dago, abstentzioa. Sanchezek aldrebeskeria ikaragarria egin du hiruko Gobernua osatzeko saiakeran. Podemosekin hitz egin gabe, Ciudadanosekin danbor eta guzti paktua plazaratu. DBHko ikasleak ere ez luke egingo horrelakorik. Gonzalez modukoak sozio izanaz, ea non amaitzen den odol-jarioa.