Trantze horretan bi tiro eta seko gelditzea desiratu izan dutenen aitorpena hor dago. Espainiako Barne ministroa, Fernandez Diaz, haserre azaldu zaigu, Espainiako Auzitegi Nazionaleko Jose Ricardo de Prada epaileak “tortura erabat aplikatu da” esan duelako. Ministroa, neurriak hartzeko prest. Ondorioa: demokrazia oporretan.
Mikel Zabaltzak jasan behar izan zuen tortura eta ondorioz heriotza salatu da Iruñean, horman pintada eginaz. Madrilgo delegatuak, Alba andreak, ETArekin lotu zuen Zabaltza. Faltsua. Baina larriagoa da loturarik ez zuela enteratu zenean, nolabait zuzendu nahian: "Baina pintada horrek Estatuko Segurtasun Indarrak zipriztindu ditzake”. ETAkoa izan bazen, Albaren ustetan, ongi torturatua.
Alde batekoa zein bestekoa izan, torturak ez du lekurik. Bereizketa egitea justifikazio kriminala besterik ez da, eta torturatzaileei hauspoa ematea. PSOEk eta PPk ehunka torturatu dituzte, eta hemengoak, salbuespenak salbuespen, albora begira eta eskuak igurtzi. Eliza mutu. Herri Defendatzailea “frogak eskuan izan arte” isilik. Bitartean, oinazegailuak martxan. Demokrazia oporretan.
