Bagenekien emandako bertsio ofiziala ez zela egia. Mundu guztiak zekien behin Intxaurrondoko infernu gorrian sartuz gero, ez zegoela gauza onik. Garai hartan askok genuen lagunen bat Intxaurrondotik pasatakoa... bañera, poltsa – burutik behera sartuta–, zigarro erredurak... Tortura horiek guztiak oso ezagunak ziren. Garai iluna, surrealista. Ohikoak ziren tortura hauek Galindo jeneralaren beldurrezko erreinuan, eta Mikel Zabalzak hantxe eman zuen bere azken hatsa.
Egun hauetan argitaratu da CESIDeko Perote jenerala eta Guardia Zibil kapitainaren arteko elkarrizketa argigarria: "Se les ha ido la mano, se les ha quedado en el interrogatorio a consecuencia de la bolsa en la cabeza". Ikaragarria, barruak astintzen dizkit entzutean! 36 urte joan dira eta jada ez dago justiziarik hori ordaintzeko, baina egia azaleratzeak beti laguntzen du.
