Zubien irudia sinbologiaz beteta dagoela jakina da, zubiak eraikitzaileak dira, lotura ezin hobeak. Txikitatik ditudan irudietan ere Zubiri zubiri, nunguari, nunguari kanta-jolasa darabilkit oroitzapenetan, inkontzienteki zubiaren kontzeptua gure izanaren barru-barruan baitago.
Zubi-bideak zubien arrebak dira, neurriz handiagoak eta, batik bat, garraio eta ibilgailuentzat eraikiak. Gaur egun ditugun azpiegitura modernoetan ezinbesteko elementuak dira orografiaren kapritxoak gainditzeko.
Oraintsu bukatu dugu Antzuola eta Bergara lotzen dituzten autobide berriaren bost zubi-bideen eraikuntza, Gipuzkoan egindako obrarik konplikatuenetakoa. Eurite, elurte, ekaitz eta eguraldi eskasa etsai izan ditugularik, geoteknian izan daitezkeen ia arazo guztiei aurre eginez gizakiaren eraikitzailetasuna gailendu da. Hortxe daude Debagoieneko ikur izango diren bost zubi-bideak, giza kate baten beso sendoak irudikatzen dituzten lotura, konpromiso eta erronkaren adibide.
