Atez ateko hondakin bilketaz ari naiz, adibidez. Ez da giro Debagoieneko zenbait herritan, Bergaran, Eskoriatzan, Aretxabaletan eta Oñatin jendea haserre dabil, sistemak berak dituen arazoez gain, Debagoieneko udal gobernuen jarrera izan da jendeak gehien gaitzetsi duena.
Gure bailara ukitzen duen azpiegitura handi eta beharrezkoa, berriz, Deskarga, auzitan sartuta dago. Geldirik, langileak langabezian, Antzuolako eta Bergarako lurjabe kaltetuak inpotentziaz beterik, beraien eremuak konpontzeko beste bi urte luze itxoin beharko baitituzte, gutxienez. Egunero joan-etorrian ibiltzen diren auto eta kamioi gidariak, arriskuz betetako errepide horretan egunero tentsio batean ibili behar. Epeleko konpostaje planta ere ez dira oraindik eraikitzen hasi lau urteren ostean. Gure hondakin organikoak ezin ditugu bertan konpostatu eta kanpora bidali behar horretarako diru mordoa ordainduz eta kutsadura areagotuz. Honen guztiaren irtenbidea ez da epe motzean ikusten, eta hori kezkagarria da.
