... malkoak begietan eta nahigabea gorputzean. Erabat hunkituta geratu naiz. Kirolari zintzoa, zintzoa hitzaren zentzu osoan, gizon bikaina gorputzez eta buruz, zeharo lurjota ikusteak jendearen egunerokotasunaren hoztasuna alde batera utzi eta askoren barruak astindu ditu. Ez naiz pilota munduan trebatua. Neu bezalaxe, beste asko ere ez, baina kirolaren eta pilotaren beraren gainetik jendeak pertsona ikusi du. Xalari, ebakuntza bat jasan ondoren, bere enpresak ez dio eskuz banakako pilota txapelketaren finala jokatzen utzi.
Araudi eta legeen gainetik, pilota enpresen interesen gainetik, historia bat dago. Historia honen protagonista ilusioz betetako kirolaria dugu. Bere burua behin eta berriz gainditzen saiatzen den kirolaria.
Ziur naiz kasu honetan ez dagoela Xalaren nahigabea baretzeko moduko dirurik. Baina Xalaren nahigabeak sortu duen erreakzioak optimismo punttu bat ematen dit. Azkenean, Xala finalean izango da. Gizartea bizirik dago eta, gainera, badu bihotzik.
