Istorioa Hong Kongen kokatzen da. Emmanuelle hirira heltzen da luxuzko hotel baten funtzionamendua aztertzeko, horretan akatsik egon ez dadin. Hotelean bezeroak kontrolatuta daude, eurei buruzko ia dena ezagutzen dute, datu horiekin euren desioak guztiz asetzeko. Perfekzio horrekin paradisuan daudela dirudien arren, bezeroei ere sortzen die mundu aseptiko eta kontrolatu batean bizi diren sentsazioa. Emmanuellek ihes egin nahi du monotonia eta hoztasun horretatik, estimulu berriak ekarriko dizkion bide misteriotsuen bila.
Audrey Diwanen bertsioa estetikoki oso zaindua dago. Luxuzko mundu batean murgiltzen gara. Argazkiak, jantziek eta sortzen den erritmoak itxura dotorea eta misteriotsua ematen diote filmari, baina, horrez aparte, kontatzen den istorioa, agertzen diren pertsonaiak, sortzen diren harremanak edo egoerak… sakontasun gutxikoak dira. Azalean geratzen dira eta, itxuraren azpitik, interes mugatuko film bat dago.
