Jolas-areto baten lapurreta bat gertatu da, eta atrakatzaileek barruan dauden pertsonak bahitu dituzte. Bahituen artean familia bat dago. Polizien artean semea
gaixo duen polizia bat dago. Lapurretan gauzak konplikatuz joango dira eta bi familien bizitzak eta interesek topo egingo dute. Pelikularen helburua ez da giza draman sakontzea, pertsonaien sentimendu kontrajarrien bidegurutzeak istorioa
korapilatzen duten gidoi-biraketen bitartez intriga bultzatzea baizik. Ezohiko egoera batean dauden pertsona normalek konponbide zorrotzak hartzen dituzte, eta, konponbide horien ondorioz, egoera gero eta gehiago tenkatu eta korapilatuko da.
Fatum thriller entretenigarriak burura ekartzen digu Paco Plazaren Quien a hierro mata filma: mendekuaren ideia erabiltzeko filmaren zati bat ospitalean gertatzen delako eta Luis Tosarrek bi filmetan antzeko pertsonaiak egiten dituelako. Filmak ondo mantentzen du tentsioa, bukaera alderako motz samar geratzen bada ere.
