Biak burugogorrak dira eta horrek norgehiagoka geroz eta latzago bihurtuko du. Padraic konforme dago bere bizimodu lasaiarekin eta arruntarekin. Colm, aldiz, mugatuta eta atsekabetuta sentitzen da. Martin Mcdonaghek ezin hobeto jokatzen du egoera, elkarrizketa errepikakorrekin bizitzaren kutsu absurdoa harrapatzeko. Badaki trama nagusiak bigarren mailako pertsonaiez hornitzen. Adibidez, Padraicen arreba Shiobanek eta Padraicen lagun Dominicek bizi diren uharte txikiko giro itogarria azpimarratzen laguntzen dute.
Uharte txiki horretatik, Irlandan gertatzen ari den 1923ko gerra zibileko oihartzunak entzuten dira. Baliteke borroka horrek bertako biztanleei eragiten dien giro goibela areagotzen laguntzea.
Martin Mcdonagheren filmetan, umorearekin eta samurtasunarekin batera, indarkeriak, lizunkeriak eta tristurak ere badute lekua. Haren pertsonaietako asko bizitzaren zirkunstantziek kolpatutako gizakiak izaten dira.