Girasoles silvestres-ek bi seme-alaba duen neska batek gizonekin dituen harreman desberdinak kontatzen dizkigu. Rosalesen istorioa hiru ataletan zatituta dago. Atal bakoitzak neskaren bikoteen izenak dituzte. Lehenengo gizona nartzisista, bizizalea, desorekatuta eta posesiboa da. Bigarrena haurren aita da eta ez du erantzukizunik nahi. Hirugarrena ulergarriena eta aurreratuena da, baina ezarritako ideia batzuetatik oraindik guztiz askatu ez dena.
Gu hiru harreman horien lekuko izango gara. Rosalesek naturaltasunez sartzen gaitu neskaren bizitzan, jasaten dituen egoerak ikusteko. Hiru istorioak sarritan ematen dira gure gizartean. Lehengoa tratu txarren inguruan; bigarrenak, gizonaren utzikeria eta heldutasun eza erakusten dizkigu; eta hirugarrenean, gizonaren ikuspegi eboluzionatuagoa erakusten digu. Agian bigarren istorioan gizonaren aldaketari garapen zerbait falta zaio.
Anna Castillo aktoreak eta berarekin lan egiten duten aktore guztiek sinesgarritasuna ematen diote kontatzen zaigun istorioari.
