Txirrindularitza galtzaile gaur. Erorketa itsusia, ondorio itsusiak eta erabaki itsusiak. Gaurko eguna Euskal Herriko itzuliko historiako orri beltzetan geratuko da itsatsia betirako, eta ez da berehalakoan ahaztuko.
Etapa ederra izan behar zuena Kruzeta mendateko jaitsieran bukatu da. Itzulia irabazteko hiru hautagaiak jausi dira, bata bestearen atzetik, eta abiadura handian. Roglic jaiki da, eta erretiratu bada ere, ez dirudi ezer larririk daukanik.
Evenepoel eta Vingegaard erietxean daude. Belgikarrak sorbaldan dauka mina, itxuraz, eta Vingegaard-ek ez du pronostikorik. Itxura txarra zeukan danimarkarrak erori ostean, bil-bil eginda, gorputzak bere atal garrantzitsuenak babestu nahiko balitu bezala.
Lasterketa neutralizatu egin da, anbulantzia eta mediku nahikorik ez zegoelako lasterketan, baina ordubete pasata, komisarioek berrekiteko agindu dute, baldintza batekin: ihesean zihoazen artean bakarrik lehiatzea etapa.
Erabaki ulerkaitza, aurreko seirek batere aukerarik ez zutelako etaparen lehian aritzeko, gauzak normal. Bi minutuko aldea zuten azken bi mendateen faltan eta tropelak aise harrapatuko zituen. Egokiena denek etapa neutralizatua egitea zen, erori eta erietxean daudenekino errespetuz. Denek edo inork ez.
Meintjes-ek irabazi du Legution, eta Skjelmose da lider berria. Etapa garaileak bere atsekabea azaldu du, gertatutakoagatik. Norvegiarrak ere ez du pozarren jantzi maillot horia. Antolakuntzak podium-eko protokoloa mantendu izana ere itzuliko historiako orri beltzetan geratuko da betirako.
