Gipuzkoan, Foru Aldundiak gobernantza irekiaren eredua sustatu du azken bi legealdietan, herritarren parte-hartzea jomugan. Hala, aurrekontu irekiak bultzatu ditu gipuzkoarren proposamenak txertatzeko aurrekontu orokorrean. Aldundiaren ildotik, beste hainbat herritan ere eratu dira partaidetzazko aurrekontuak: Arrasate, Getaria, Irun, Lasarte-Oria, Zarautz… Oñatiko Udalak ere bi aldiz eman die aukera herritarrei Udaleko proiektuetan zuzenean eragiteko, udalbatzako bi alderdi politikoen adostasunarekin eta lanketarekin (EH Bildu, EAJ) eta 500.00 euroko diru-lerroarekin: 2018an (19/20 urteetarako) eta 2022an (23/24 urteetarako).
Azaroan bozkatu dira teknikoki bideragarri iritzitako 21 proposamenak; bederatzi aukeratu dira. Horien artean, Udalak aldiro egin beharko lituzkeen mantentze-lanak daude, baina ez dituenak egin: plazako kioskoaren eta frontoiaren arteko zoladura berriztu, Berezaoko mahaiak eta bankuak konpondu eta Iturrigorriko zelaia garbitu.