Han bizi den emakume talde batekin (oraingoz ez delako gizonik animatu) elkartzen gara, eta puntua egiten dugu. Eurendako relax-une bat dela diote, eta guretzako, motibazio iturria.
Hasieran beldur apur batekin hasi baginen ere, emakume horiek oso erraz jarri digute bidea. Puntada baten eta bestearen tartean, hari-zuntzen artean eta kafe egin berriari trago batzuk emanez, konfiantzan eta entzuketan oinarritutako lagun-giro atsegina sortzen ari gara, eta askatasunez hitz egiten dugu gure ardurez, amodioez, beldurrez, gure ametsez...
Eskerrak eman nahi dizkiegu astero hartzen gaituzten emakumeei eta bereziki eskerrak Isabeli, Eibarko Artile dendakoari, orratzak eta artileak doan emanda aurrera jarraitzeko animoak ematen dizkigulako. Eskerrak Juanitari eta beste zenbait laguni ere, ikusten ez den euren lanari esker, gizarte onbera eta justuagoa lortzeko borondatezko lan hauek egiten jarraitu ahal dugulako.
----------
Araceli Lorenzo eta Ana Pascual
Antzuola