Partidako 10. minutuan, erasoaren eskuin aldetik bideratutako kontraeraso azkar batean, Hasier Arregik baloia bigarren zutoinerantz erdiratu du, eta Oier Gerreirok erremate eder batekin Urko Tolosa atezaina gainditu du. Hiru minutu beranduago, Aloñakoek ondo jositako jokaldi batean baloia legazpiarren arearaino eraman dute, eta penalti puntu inguruan geratu den baloia harrapatu du Markel Guridik eta ondo bideratutako jaurtiketa batekin oñatiarren bigarren gola lortu du. Abantaila horrek ematen duen lasaitasunarekin Unai Garairen mutilek jokoa kontrolpean izan dute, nahiz Ilintxakoek borrokan jarraitu duten gola lortzeko.
Bigarren zatiak ez du historia handirik izan. Aloñakoak sendo egon dira atzealdean, eta Ilintxakoak ez dira gai izan jokaldi arriskutsurik antolatzeko.
Aloñakoek beste 3 puntu eder lortu dituzte, sailkapenaren buruan egoteko aukera ematen diotenak. Gabonetako etenaren ostean, urtarrilaren 11n, sailkapenean hirugarren dagoen eta bolada onean diharduen Intxurre taldearen aurkako partida izango da.
Bide batez, urteko azken jardunaldiaren ostean, eta, Gabonen atarian, jaso egizue Aloñako familia osatzen dugun guztion partetik gure desiorik onena.
Futboleko taldeetan asteburuan lortutako emaitzen taula:
