Kartzeletako transferentzia Gernikako Estatutuan aurreikusita zegoen, eta aurten, 42 urteko atzerapenarekin, euskal espetxeen funtzionamenduaren ardura Eusko Jaurlaritzaren esku gelditu da. Hiru espetxe, 1.000 lagun baino gehiago preso –44 EPPK-koak–, 700 langile inguru, eta hau guztia kudeatzeko, 70 milioi euroko deskontua kupoaren ordainketan.
Preso guztien birgizarteratze prozesuak onez landuko ditugula entzun dugu, emakume, adingabe eta eriek arreta berezia izango dutela, erdi-askatasuneko erregimena bultzatuko dela, gizartean bizikidetzaren etika sustatuko dugula, pobrezia eta bazterketa egoerak saihestuko ditugula, eta biktima guztiei arreta eta erreparazio zabala ematen saiatuko garela.
Gai honetan asko dago adosteko eta egiteko, badakit, denok dakigu, baina, gutxienez, leiho berri bat ireki zaio giza duintasunari. Ez da erronka makala! Nola gozatu askoren eta askotariko zauriak eta sufrimenduak? Nola baretu amorruak eta mendeku goseak? Nola egin lekua damua eta barkamenari?...
