Titulua lortzea zen helburua, eta lortu bezain bizkor utzi genituen klaseak. Udaberria bizikleta gainean pasatzen dute askok, Quebranta prestatzeko, eta amaitu ostean zin egin euren buruari ez direla bi hilabetez bizikleta gainean eseriko. Korrika egiten hasteko helburu politak dira San Silvestre eta Lilatoia. Gradua, masterra eta aparteko formazioak egiten ditugu, helmugan gure ametsetako lana zain izango dugulakoan. Helbururik ezean ez al du zentzurik egiten dugun ezerk?
Badira urte batzuk bertso eskolan elkartzen hasi ginenetik. Hasi ginenean baino hobeak garela dio maisuak; astearen araberakoa dela esango nuke nik. Ez dugu txapelketarik prestatuko, eta, ziurrenik, lagun arteko saio informalez harago, ez dugu inon kantatuko. Hala ere, ederra da albokoari entzutea: "Egun desastrea izan dut lanean, baina pozik noa etxera". Presiorik eta betebeharrik ez dagoenean, plazerak bere lekua aurkitzen du. Probatu duenak badaki zer den hau. Probatu nahi?