Ezker Batuaren eta Osasuna futbol taldearen arteko konparazioa, hain zuzen. Haren ustez, Osasuna euskaldun askoren bigarren taldea da: futbolzale askok Osasunak irabaztea nahi du, baina horien talde kuttuna beste bat da, "gorritxoen" taldea, bigarren aukera da. Politikan ere berdin, askok begi onez ikusten du EB, baina hautestontzian bozka sartzeko orduan kuttuneko alderdia beste bat da.
Ezker Batuak azken asteotan eman digun ikuskizuna Osasunak Nafarroako Erreinuan inoiz jokaturiko partida ikusgarrienarekin konpara daiteke: jokoz kanpoko jokaldiak, faltak, kanporatzeak, golak… eta bitartean harmailetan ikusleok zur eta lur zelaian gertatutakoa ulertu ezinda. Auzo lotsa sentitu dugu askok egoerarekin, Ezker Batuak (izena ere paradoxa bilakatu da) partida eta maila galdu ditu.
Gorabehera askoren ondoren, taldeak bitan zatituta jarraitzen du eta azken hilabete honen ostean, berriz adiskidetzea ezinezkoa izango zaie. Hobe lukete alderdia desegin eta modu duinean bukatzea, bestela, bukaeran, eta futbolean gertatzen den moduan, epaile batek hartuko ditu erabakiak eta berehala ikusiko ditugu bi korronteak erabakiaren bidegabekeria prentsaurrekoan salatzen.