Beste batzuei arimarik ez, baina kolorea daukaten zenbakiek hartu diete gorriaren tonalitate guztiak. Tabernak itxiarazi eta kirola taldeetan egitea galarazten zigun eremu gorria ezagutu dugu, epaile batek erabaki zuen arte gorriak eta beste edozein koloretako edariak tabernetan edateak ez zuela eragiten herriei ematen zitzaien kolorean. Bitartean, gorria den planetara iritsi dira gizakiok eraikitako tramankuluak, noizbait lurrean bizitzeko argi gorriak pizten badira balizko ihesbide izan ote daitekeen aztertzera.
Eguzkia urrutiegi, ordea, Marten. Eguzkiaren berotasuna gertuago sentitu nahi dugu eta berotasun horri esker espero dut gorri-gorri ikustea orain ereindako haziek emango dituzten fruituak. Eta ez dut esperantza galduko ordurako herri honetako kirol taldeen gorria ikusteko hango eta hemengo kirol-guneetan eta ezta ere orain ezkutatuta dauden zuen ezpainen gorria ikusteko, eta sentitzeko.
