Kasu hartan, KMK 2017k Bergarara ekarri duen auzolan ariketaren inguruan, eta, zorionez, herri honetan ez dago atsedenik eta auzolanak jarraitzen du.
Aurrekoan demasa izan bazen, oraingoan zuria ala beltza edota zuria eta beltza da auzolana. Errigoraz ari naiz. Hainbat helburu bateratzen dituen auzolan erraldoiaz.
Nafarroako hegoaldean ekoizten dena gainerako herrialdeetan saltzen da, zuzenean. Beraz, gure produktuen ekoizpena eta kontsumoa bultzatzen ditugu. Sasoiko produktuak. Osasuntsuak. Ingurumena eta osasuna zainduz, eta, gainera, etekinen zati bat hain beharrezkoa duen Nafarroako euskalgintzari bideratuko zaio. Borobila. Auzolan nazionala; sektore produktibo bat laguntzeko eta gure izaera nazionalaren ardatza den hizkuntzari bultzada emateko helburuarekin.
Asmatu zuenak bete-betean asmatu zuen. Auzolanean helburu asko betetzeko bidea eman digu.
Bi saski aukeran, oraingoan. Zuria eta beltza. Nik biak hartu ditut, zer gutxiago.
Zorionak asmatzaileei, antolatzaileei eta lanean ari diren milaka boluntarioei.
