Demasa izan da Aranzadiko Komunitateko kideok eta gurekin elkarlanean aritu diren eragileok aurten bizi izan duguna eta are demasagoa emaitza. Igandea borobila izan zen Bergaran.
Auzolan erraldoia izan dugu euskararen, euskal kulturaren eta euskal hezkuntza-sistemaren alde. Familia askotan hiru belaunaldi aritu dira elkarrekin auzolanean. Jatorri, pentsaera, ibilbide eta nortasun ezberdinetako milaka pertsona elkarrekin lanean. Larunbatean eta igande goizeko lehen orduetan bizi zen giroa zaila da deskribatzen; demasa.
Urriaren 2a borobila!
Eta iritsi dira urriaren 3a, 4a, 5a… eta hurrengo hitzordua 16an daukagu Nafarroan. Helburua, bera. Vianarako dei egiten digute Nafarroako ikastolek. Auzolanak darrai.
Eta iritsiko dira 17a, 18a, 19a… eta auzolanean jarraitu beharko genuke. Eta bereziki euskararen erabileran egin dezakegu auzolan erraldoia aurrerantzean ere. Erabili, erabili eta erabili belaunaldiz belaunaldi, eremu guztietan eta ahalik eta jende gehienarekin. Auzolanean hau ere.
