Niretzat beti izan da konplikatu samarra sutara zer bota erabakitzea, baina aurten benetan zaila egin zait. Denbora gutxian hainbeste gauza izan ditugu sutarako esku artean: LOMCE legea, Abortuaren Legea, fracking-erako baimenak, Kutxabank pribatizatzeko saiakera eroa, dispertsioa, preso gaixoen egoera krudela…
Baina San Juan bezperan beti naiz baikor. Sutara botatako hauekin batera ikusten ditut Bergarako Hezkuntzaren Mahaia, mugimendu feminista, fracking-aren aurkako plataforma Debagoienera ere zabaldu izana, presoen aldeko sare herritarra, Kutxabank publikoaren aldeko hainbat eragile... San Juan eguneko ihintzetan oinutsik ibili eta hurrengo urterako gaitzak alboratu eta lanerako kemena erakutsi du beti herri honek eta oraingoan ere horretan diharduela esango nuke.
Beraz, erre ditzala suak diruaren interesek bakarrik mugitzen dituzten proiektu horiek guztiak eta indartu ditzala ihintzak bestelako jendarte baten defentsan diharduten herri-mugimenduak.