Ez du konplexurik izan Estatu Batuetan dauden ehunka hizkuntzaren artean bigarren hedatuena erabiltzeko. Bertako presidenteak, gazteleraz ez badaki ere, aurkitu du modua ulertzeko.
Gureari, azkenaldian, nabarmen batzen ari zaizkio gero eta hizkuntza gehiago. Enpresetan ohikoa da entzutea "gure produkzio-gune eta bulegoetan hamar hizkuntza hitz egiten dira" modukoak. Eta horri lotuta, hauxe: "Kudeatu beharra dugu". Halaber, herrietan hasi gara ikusten eskuorriak hainbat hizkuntzatan –euskara eta gaztelerarekin batera–.
Iruditzen zait inozenteegiak garela euskal hiztunok. Nork dio enpresetan hizkuntza aniztasun berria kudeatu behar dela? Besteak beste, hizkuntza bi zeuden garaian –euskara eta gaztelera– ezer gutxi egin zuenak euskararen egoera normalizatzeko.
Hizkuntza boteretsuek egiten ez dutena larrialdi egoeran dagoen hizkuntzak egin behar ote du? Hizkuntza zapaldua izan behar al da adeitsua?
Euskararen ikasketa eta erabilera posible egin beharrean, Super Bowlaren tamainako gola sartzen ari gara gure atean.