Higiene teknologikoa

Erabiltzailearen aurpegia

Urte batetik bestera teknologia berriez baliatuta gutaz gehiago jakin dezakete erakunde publiko eta pribatu batzuek. Pista asko ematen dizkiegu bankuko txartelaz ordaintzean, telefonoa aldean eramatean, fideltasun txartelaz puntuak lortzean, sare sozialetan jardutean, Interneteko bilatzaileak erabiltzean… Informazio hori guztia gure kalterako erabil daitekeenez, higiene neurriak hartzea komenigarria da.

Arlo fisikoan hainbatetan eskuak garbitzen ditugun moduan, ohitura berriak barneratu beharra gaude algoritmoen aurrean. Aplikatzeko errazagoak edo zailagoak diren ondokoak izan daitezke: noizean behin, sakelakoa etxean utzi eta txartelak ez erabili –bankukoa, dendetakoa, errepideen teleordainketakoa… eta onuran izango genituzkeen zentimoak edo zartagina sakrifikatu–; aldian behin, Interneten gure ohikotasunetik kanpo dauden gaiak begiratu; sareetan Atsegin dut ez sakatu...

Helburua da algoritmoak despistatzea. Jakina, denborarekin jokaera horiek ere identifikatuko dituzte eta higiene neurriak egokitu beharko dira, aurreko urtean eskuak garbitzen berriro ikasi genuen bezala.

Urte berri on.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.