Komunikabideetan eta kalean ikusi dugu herritarrak ez gabiltzala beti arduratsu. Pandemiari aurre egiteko modu batzuk jendearen eskuetan daude: higienea, pertsonen arteko distantzia, maskaren erabilpena, harremanak murriztea, itxialdiak betetzea… Beste zenbait ez daude herritar soilen ahalmenen baitan, agintarienetan baizik. Hasierako kolpearen ostean hainbat neurri hartu zituzten: ekipamenduen hornidura, ospitaletako ohe bereziak gehitzea, testak egitea, protokoloak arautzea… birusaren aurretik egoteko. Hala ere, pandemietan arrastoa jarraitzeko oinarrizko tresna diren aztarnariei dagokienez, ez zuten arduratsu jokatu: uztailean, birusak gure artean gutxienez lau hilabete zeramatzanean, 33 aztarnari besterik ez zegoen EAEn – gaur, laurehun inguru dira–. Espainiako Estatuko aztarnari kopuru urria buruan izango zuen Cañizares kardinal espainiarrak esan zuenean: "Konfiantza Jaungoikoan jarri beharra dago".
Zaindu gaitezen.