Aurrerago, sinesteari utzi nion. Ez dakit zergatik, ondorioztatu nuen horrelako komentarioak bisitarien kortesiarekin lotuta zeudela eta edonon gauza bera esango zutela. Edonola ere, ez zeuden oso oker. Azken urteetan atzerritar asko izan ditut inguruan eta batek baino gehiagok ondokoa adierazi dit: "Zeharo harrituta nago umeak herriko plazan jolasten ikusteaz". Eta zergatia: "Ni bizi naizen lekuan umeak ez dira gurasoengatik metro bat aldentzen; ez daukagu komunitate bizitzarik; berdintasunik eza nagusi da".
Gipuzkoan, berriz, Gini indizea –desberdintasun ekonomikoa neurtzen duen adierazle nagusietakoa– 25,3 da, munduko herrialde berdinzaleenetatik gertu –eta hortxe funtsezko eragina dauka bailarako ekonomia sozialak–. Horren espresio bat da, gure artean, umeak plazan jolasten aritzea.