Gerora, Arrasate Irratian entzun, telebista tertulietan ikusi eta, nola ez, lerro hauetan botatakoak irakurtzeko aukera izan duzue nahi izan duzuenok. Denetarik esandakoa naizenez, ezinbestean, denetariko erreakzioak jaso ditut. Gertukoengandik, adiskideengandik, ezezagunengandik, eztabaida zaleengandik, ulermenetik eta beste asko....
Ingurukoak, herria eta iritziak horrela izan behar dute, anitzak. Toki, izaera eta iritzi ezberdinetatik elkarbizitza zoriontsu bat eraikitzeko gai izan behar dugulako. Enpatia eta asertibitatea dira giltza eta oinarri; joder, zein hitz potoloak!
Erraza da, bestearen tokian jarri eta saiatu hura ulertzen. Hori bai, norberaren eskubideak defendatzearen alde egin, besteen eskubideak eragotzi eta urratu gabe. Sentimenduak ez dira gure esku egoten, nik hainbat mindu ditut, nahiko nukeen azkena hori izan arren. Orain niri ere asertziozkoa izatea tokatzen zait, Goienari emandako iritzien talaia honengatik eskerrak emanez, irakurri nautenei beraien denbora eskaintzeagatik esker ona adieraziz; eta, gogoetaren bat edo beste sortzeko gai izan banaiz, eskaini dudan denbora ontzat emanez. Bai, agur esaten ari naiz. Hurrengo bat arte, balego. Izan libreak, izan euskaldunak!