Gurean, 46 etorkin abandonatu zituzten Donostiako autobus geltokian. Ustez, Almeriako Gurutze Gorriak artatu eta autobus batean sartu zituen inongo helmugarik gabe.
Zenbat ez ote dira gelditu munduko hilerri handiena bihurtu den Mediterraneo itsasoko uretan. Eta iristen direnak ez dira inoiz hemengoak izango. Izateari utzi baitzioten bere sorterria atzean utzi zuten momentuan. Ez dira ezer eta ez dira inongoak.
Sarrionandiak ederto ezagutzen ditu inongo lekuak. Geratu egiten gara ala joan. Hala ere, geratzen garenean ez al gara apur bat joaten? Eta joaten garenean ez gara geratu egiten? Ezinbestekoa al da abiatzea eta ailegatu ezinean geratzea? Abiatzen dena ez da egundo inon geratuko? Ala itzuliko da? Baina, itzultzen dena abiatu zeneko lekura itzultzen da ala?
