25 urteotan, urtero-urtero izan dute gogoan, eta haren urtebetetze egunaren bueltan (otsailaren 22a) lagunek beti antolatu izan dute zerbait; gehienetan irteera bat –Anboto mendira, sarritan– eta ondoren, bazkaltzeko elkartu.
Urteurren berezia izanik aurten, ospakizun berezia egin gura izan dute, eta etxekook ere gonbidatu gintuzten. 25 urteotako ekitaldien argazkiak ikusi genituen lehenengo, elkarrekin, eta ondoren, Iturrigorri pilotalekura jo genuen. Txistularien doinuei jarraituta bi lagunek aurreskua dantzatu ziguten, Jonen omenezko txapela aurrean zela, Lagunak beti lagun leloaren bueltan. Une hunkigarria izan zen guztiondako, berba bakar batzuekin azaltzeko benetan zaila. Muru Alde elkartean bazkaldu genuen gero; 50 bat lagun elkartu ginen. Eta ospakizunak luze jo zuen. Abestu egin genuen, dantzan, barre egin genuen eta negar.
Eta horregatik guztiagatik, eskerrik asko. Eskerrik asko 25 urteotan, urtero-urtero, Jonekin akordatu izanagatik. Eskerrik asko, gu ere zuen artera gonbidatzeagatik aurten. Eskerrik asko, lagunak beti lagun direla erakusteagatik. Eskerrik asko.
Jon gure artean dagoela sentiarazteagatik.
-------
Aitor Antxia Alberdi
Jon Antxia Alberdiren senideen izenean.
Aretxabaleta.
