Joan den larunbatean, apirilaren 12an, Kick Boxingeko Euskadiko Txapelketa jokatu zen Bilboko La Casilla kiroldegian. Ekitaldia Euskadiko Kick Boxing eta Muay Thai Federazioak antolatu zuen.
Tano Team taldeko Patricio Bini eta Danel Izurrategi borrokalariek parte hartu zuten txapelketan, biak Saioa gimnasioaren ordezkari. Maila handiko jarduna izan zuten biek eta euren kategoriatan Euskadiko txapeldun izateko borrokatu zuten.
Patricio Binik lan bikaina egin zuen LIGHTCONTACT eta FULLCONTACT modalitateetan, biak irabazita Euskadiko txapeldun bihurtu zen. Emaitza horri esker, Espainiako Txapelketarako sailkapena lortu du, eta maiatzaren 22tik 25era bitartean jokatuko da La Nuciako (Alacant) herrian.
Bestalde, Danel Izurrategik KICKLIGHT modalitatean lehiatu zen, eta finalera iritsi zen. Borrokaldi estua izan zuen, azken segundura arte maila handian borrokatuz. Azkenean, gutxigatik ihes egin zion lehen postuak, baina lan oso txukuna egin zuen. Espainiako Txapelketan parte hartzeko postu batera geratu da, eta agian aukera izango du han lehiatzeko.
