Kirola guztiontzat
Ointxe! klubak urrats sendoa egin du saskibaloia herritar guztiengana hurbiltzeko eta aukera berdintasuna sustatzeko. Urte osoko kuotarik ez izateak erraztasun handia emango die famili askori, eta kirola egiteko motibazioa handitu egingo du. Gainera, izena ematen duten guztiek jokorako ekipazioa jasoko dute, taldeko partaide sentimendua areagotuz eta talde nortasuna sendotuz.
Ointxe klubarendako berebiziko garrantzia du saski eskolak; klubaren oinarria da eta mimoz lantzen saiatzen gara. Saskibaloia talde kirolak izanik, talde lana, errespetua eta diziplina lantzen dira. Helburu txikiak lortzen ikasten dute, porrotetik ikasiz eta ahalegina baloratuz. Saskibaloiak gorputza koordinatzea, abilidade motor finak eta orokorrak garatzea eta osasun ohitura onak eskuratzea ahalbidetzen du.
Izen-ematea irekita dago jada
Izen-ematea dagoeneko zabalik dago, eta interesa dutenek Ointxe! klubaren webgunean (ointxe.eus) egin dezakete matrikula.
Klubetik adierazi nahi dugu esperientzia eta maila guztietako jokalariak ongi etorriak direla, eta talde ezberdinetan parte hartzeko aukera izango dela adinaren eta mailaren arabera.
Animatu eta zatoz Ointxe familiara.