Egun eta ordutegia aldatu ditugu: orain hileko hirugarren ostiralean egingo ditugu dantzaldiak, 19:30etatik 21:00etara.
Gainontzean, betiko izpirituari eutsiko diogu: dantza eta musika tradizionala, denetariko dantza motak (sokan, bikotean, taldeka, korruan...), eta helburua, elkarrekin dantzan ondo pasatzea. Sarrera doan eta parte-hartzea libre. Dantza gidaria: Patxi Montero. Antolatzailea: Portaloi elkartea.
Dantzaldien egutegia hemen ikus daiteke: http://www.dantzan.com/kidea/herrixadantzan
Dantza ikastaroak martxan
Bestalde, 70 lagunek eman dute izena Plazako Dantza Tradizionala ikastaroetan. Joan den astean abiatu ziren ikastaroak. Maiatza bitartean, astero izango dira klaseak, astelehen edo asteazkenetan (taldearen arabera). Helduentzako ikastaroak dira, eta helburuak, dantzan ikastea, Euskal Herriko plazetan erabili ohi diren dantzak ikastea, eta dantza tradizionalaren ezagutza aberastea. Portaloi elkartea da ikastaro hauen antolatzailea, eta Patxi Montero dute irakasle.
