EHBILDU UDAL TALDEAREN PROPOSAMENAK EAJK AURKEZTUTAKO PLANARI COVID-19 KRISIAK ERAGINDAKOARI AURRE EGITEKO
Talka eta suspertze-plan bat behar da eta horretarako gu guztion arteko lan-talde bat martxan jartzea beharrezkoa da.
Talka eta suspertze-plan horrek gutxienez ondorengo esparruak kontuan izatea proposatzen dugu:
-
Sortu den eta sortuko den larrialdi sozialari aurre egiteko diru-laguntza pertsonalak. Arazo larriak sortuko direla aurreikusten dira; Eskoriatzan langabeziak gora egin du (maiatzeko datuen arabera %9,5ekoa da langabezia tasa) … inor bazterrean ez uzteko, herritar guztiek izan behar lituzkete dagozkien lehen mailako beharrak bermatuta: elikadura, jantziak, argi-indarra, ura, etxebizitza …
-
Zaintza eta Hezkuntza arloan arreta berezia jarri sortu daitezkeen beharrei, batez ere, ikasturte hasieran.
-
Merkatari eta autonomoen kasuan, itxita egon direnei dirulaguntza espezifikoak; erosketa-bonoen aukera komertzio guztiei zabaldu, itxita edo zabalik egon; Covid-19a dela eta hartutako segurtasun eta osasun neurriek sortutako gastuei laguntzeko dirulaguntzak (EPIak, manparak, gelak …); bistaratu eta lagundu lehenengo sektorean dihardutenei.
-
Zaharren egoitzari arreta berezia eskaini. Alde batetik, Covid-19a dela eta hartu diren osasun eta segurtasun neurriak sortu duten kalte ekonomikoari kontra egiteko dirulaguntzak onartuz eta, bestetik, berragertze baten aurrean prest egoteko neurriak martxan jarriz. Kudeaketa bikaina egin da eta bikaintasun hori mantenduko dela bermatzea gure lana ere bada.
Plan hori aurrera eramateko, udal finantzaketa indartu behar da. Ez da garaia murrizketak egiteko, ez zerbitzu publikoetan ez udaletxeen finantziazioan. Are gutxiago, Foru Aldundiak egin duen bezala hartutako erabakiarekin, funtsaren murrizketarena, baldintzatu egiten duelarik udaleko jarduera. Dirua badago; beste fiskalitate eta aberastasun banaketa era bat martxan jartzen bada. Dirua badago; herritarren alde lan egiteko, lehentasunak ondo markatu behar dira eta inbertitu Eskoriatzako herritar orok bizitza duina izan dezan.
Dirua badago; momentua da erabiltzeko ...
Eskoriatzako Ehbildu Udal-taldea.