Torrebasoko Industrialdean Eskoitzarrok Parke historiko dotorea daukagu. Ziurrenik Eskoriatzako parke ederrena.
Orain 20 urte inguru, industrialdea eraikitakoan, Udalak ondo babestu zituen bertako zuhaitzak. Edorta Zubizarreta eta bere lantaldeari esker zutik daude Setalde onduan dauden arbolak (bereziki interesgarriak dira hango sekuoia gorria eta izeia). Aldundiko arduradun batzuk ere etorri ziren babes lanetan laguntzera zuhaitz horien garrantziaz konturatuta.
Gaur, ordea, eta egungo Udal arduradunen utzikeriagatik, parkeko zuhaitz horien ondotik kanalizaziñuak egiten hasi dira. Itxura denez, kanalizaziñuak, Ederlan parean semaforoak jartzeko dira, argindarra hartzeko.
Aldundia da obraren arduraduna, baina, parkea publikoa izanik Udalarena da ondare hori babesteko ardura.
Kontua da kanalizaziñuak egiteko makineria astuna erabili dutela eta zuhaitzen sustraiak dexente kaltetu dituztela, zuhaitz horien etorkizuna kolokan jarriz.
Lotsagarria da ehundaka urte hartzekoak diren zuhaitzak horrela tratatzea . Eta are lotsagarriagoa zuhaitz horiek guztionak direla jakinda.
Baina agian txarrena da obra hori Aldundiak egiten duela Eskoriatzako Udalaren onespenarekin.
Zelako eredua!
Salatu udal eta aldundiko arduradunen utzikeria!
Zaindu guztiona den ondarea!!