Sorginak Emakume Elkarteko kideek Hondarribira egin dute txangoa

Imanol Beloki Unamuno

Sorginak Emakume Elkartekoak, Hiruzta txakolindegian. Ainhoa Barandiaran

Leintz Gatzagako Sorginak Emakume Elkarteko kideek urtean zehar hainbat ekintza eta irteera antolatzen dituzte, elkarrekin egoteko, esperientziak partekatzeko eta herriko emakumeen arteko harremanak sendotzeko. Sanmilixanetan, esaterako, euskal erromeria egin zuten, eta, bertan egindako dantzaldiak izandako arrakastaren ondoren, beste hitzordu bat izan dute elkarrekin gozatzeko; hain zuzen, hemeretzi lagunek egun-pasa egin zuten Hondarribian.

Joan den zapatuko irteera Leintz Gatzagan hasi zuten, eta lehenengo geltokia Zarautzen egin zuten. Izan ere, goiza Karlos Argiñano jatetxean gosalduz hasi zuten, indarrak hartzeko eta eguna giro onean hasteko. Gosaldu ostean, Hondarribira abiatu ziren, eta han Hiruzta txakolindegia bisitatu zuten. Bertako instalazioak ezagutzeaz gain, txakolinaren ekoizpen-prozesuaren inguruko azalpenak jaso zituzten. Bisitaren ondoren, Hondarribian bertan bazkaldu zuten, eta bazkalosteko solasaldiekin eta lagunarteaz gozatu zuten.

Gabonetan, talo-jana

Hurrengo hitzordua ere badute dagoeneko buruan. Hain zuzen ere, Gabonetako oporraldian taloak egiteko elkartuko dira. Egun horretan, elkarrekin taloak prestatu eta jateko aukera izango dute, baina baita interesa duenari egiten irakastekoa ere. Horrela, ohitura eta jakintza partekatuz, urteari amaiera emateko plan polita prestatu dute.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Batu zaitez Goiena albisteen kanalera.

TELEGRAM: Batu zaitez GoienaAlbisteak kanalera.


Harpidetza aukera guztiak