Lehendakari Txapelketako hirugarren lasterketa jokatuko dute domekan Leintz Gatzagan (09:00), Dorletako Ama saria. Azken urteotako edizioei dagokienez, antolatzaileek ez dute berritasunik aurreikusi, duela bizpahiru urte zirkuitua gogortzearen aldeko erabakia hartu zutenetik bere horretan geratu da-eta lasterketa, baina bai izango da lasterketa antolatzen ibili diren beteranoentzako azken edizioa. Alegia, Joxerra Agirreurretak, Xalbador Azkoagak, Jon Sasiainek eta Alberto Altubek domekako lasterketaren ostean atseden hartuko dute. "Gatzatrail antolatzen ibili ziren herriko gazteek erakutsi ziguten gaur egun gauzak zelan egin behar diren, eta ordua da eurek erreleboa hartzeko", dio Agirreurretak. "Gu laguntzeko egongo gara, baina eurak arduratuko dira lasterketa antolatzeaz".
Proba luzatzeko asmotan
Aurten Araba aldean lasterketa luzatzeko asmotan egon badira ere, azkenean iazkoaren itxura izango du domekakoak. "Gurea mendiko lasterketa da, igoeraz betea; horrek gogortzen du proba". Hala, ziklistak lautan igoko dira Aretxabaletako Txarapea kaletik Bernabe ermitara (Apotzaga), eta beste lautan igoko dituzte Gatzagako maldak. Guztira 117 kilometro izango ditu lasterketak, eta irteeran 150 txirrindulari inguru espero dituzte. 50. kilometroan sari berezia izango da, Aretxabaletan; 82. kilometroan tarteko helmuga, Eskoriatzan; eta Gatzagako lehen igoeran iturritik lehenengo pasatzen denak Rafle saria izango du.