Rosa Urretak, Leintz Gatzagako Sorginak Emakume Elkarteko kideak, azaldu du zapatu goizean Leintz Gatzagan elkartuko direla, herrigunean zerbait hartu, zapi moreak banatu, talde-argazkia atera eta, aldi berean, eskapularioak ere banatuko dituztela elkartzen direnen artean, bazkaltzera joan aurretik. "Arrasaten Maritxu Kajoi egunean egiten den moduan, urtero ateratzen ditugu gure eskapulario propioak, eta aurten egindako berriak ere banatuko ditugu. Ondoren, Gure Ametsa jatetxera joango gara, urtero moduan, elkarrekin bazkaltzera, eta bertan 20 eta 25 lagun artean elkartuko gara. Bazkalostean, berriz, trikitilariak izango ditugu, giroa alaitzeko eta pixka bat dantzatzeko, eta espero dugu askorik ez garela luzatuko", azaldu du.
Erratzaren misterioa
Urte askoan erratz banaketa ere egin izan dute Martxoaren 8an elkartzen direnen artean. Zozketa bidez egin izan dute, sorpresaz norbaiti eman… eta beti, bertaratutako emakumeetako bati aitortza moduan ematen diote erratza. Aurten, ordea, oraindik ez dute erabaki banaketa egingo duten edo ez.
Domekan, Eskoriatzara
Martxoaren 8a domekan izango denez, "Eskoriatzan antolatutako ekintzetara batuko dira elkarteko kideak", adierazi du Urretak. Gaineratu du zapatuan batuko diren guztiak ez elkartu arren gehienak izango direla: "Eskoriatzarrekin elkartuko gara eta kalejiran parte hartuko dugu; ondoren, pote bat hartu eta etxera egingo dugu, eguna amaitzeko".