Haur eta gaztetxoak batu ziren, batez ere, Aratuste-zapatua ospatzeko. Pilotalekuan babesa hartuta, euria ez zen eurentzako traba izan eta egunerako Leintz Gatzagako Gurel Guraso Elkartekoek prestatutako jolasak egin ahal izan zituzten.
Aratusteak iritsi aurretik, herritarrek aukera izan dute Labidea dendan aurtengo mozorroen inguruko proposamenak egiteko. Besteak beste, GatzagaGym —herrian aurten irekitako gimnasioari keinu eginez— eta Inuitak izan ziren aukeretako batzuk. Azkenean, askotariko mozorroak ikusi ahal izan ziren kalean, eta irudimena nagusitu zen.
Jolasak egin ostean, poteoa izan zen, eta ondoren bazkaria egin zuten Toki Eder elkartean. Hogei lagun inguru elkartu ziren mahaiaren bueltan, eta bazkalostean, DJrik izan ez zuten arren, bertaratutakoek eurek jarri zuten musika, dantza pixka bat eginez.
Elkarrekin ondo pasatu
Aiora Elkorobarrutia Gatzagako Udaleko Kultura zinegotziak nabarmendu du garrantzitsuena dela "mozorrotu, kalera irten eta elkarrekin ondo pasatzea", eta horixe egiten saiatu direla herritarrak, euri zaparradek aterpera joatera behartu arren.
