Leintz Gatzagako Udalak herri batzar baterako deialdia egin du, Leintz Gatzagako Hautesle Elkartea osatzen duten udal ordezkariek herritarrekin elkarbanatu nahi dituztelako esku artean dituzten gaiak. Hain zuzen ere, udalerriko gai nagusiei buruz jardun gura dute gatzagarrekin, zuzenean informazioa jaso, iritzia eman eta erabakiak partekatzeko aukera izan dezaten. Batzarra gaur bertan izango da, abenduak 12, 18:30ean, udaletxean.
Gai-zerrenda luzea
Gaurko saioan, herriko interesekoak diren hainbat gairi helduko diete udal ordezkariek eta batzarrera joaten diren herritarrek; tartean: udal gimnasioaren egoera, erabileraren eta instalazioaren arau orokorrak, konpost zerbitzuaren gainean hartu beharreko erabakiak –konposta egiteagatik zegoen hobaria ezabatzea edo ez…–, etxebizitzen inguruan egindako galdeketaren emaitzak eta komunitate energetikoarekin lotutako proposamenak. Horrez gain, bestelako gaiei buruzko ekarpenak egiteko aukera ere izango dute herri batzarrera doazenek; izan ere, udal ordezkariak herritarren beharrak eta iradokizunak entzuteko asmoz izango dira.
Herritar guztiei irekita
Udalak herritar guztiak gonbidatzen ditu batzarrean parte hartzera, tokiko erabakiak modu ireki eta parte-hartzailean eraikitzeko asmoz. Haien iritziek eta ekarpenek herriaren etorkizuneko proiektuak zehazteko garrantzi handia izango dute.