Funtzionamendu onaren isla da eskaerak handitu egin direla eta aukera gehiago jarri dituztela horietako hainbat zerbitzutan. Ile-apaindegia egun bakarrean ematetik bira pasa da, eta, fisioterapeuta zerbitzua hilabeteko azken astelehenetan izanda, orain hurrengo astearte arratsaldeetan ere jarri dute. Azkenik, podologia zerbitzuak bi hilabetetik behin izaten jarraitzen du.
Ile-apaindegiak harrera ona
Astean behin arratsaldeetan ematen zen ile-apaindegi zerbitzua; orain, berriz, bi aldiz astean. "Astelehen eta asteazken arratsaldeetan ematen dut zerbitzua, 13:00etatik 20:00ak bitartean. Harrera oso ona du, eta telefonoz deitzen didate, kalean topo egin eta ordua hartu… herri txikia da gurea eta denok ezagutzen dugu elkar. Horrela hartzen du ordua jendeak. Antolatu egiten gara, eta ez da gutxi. Gero, baserrietara ere joaten naiz ilea moztera; izan ere, askok zailtasunak dituzte herrira jaisteko, eta kasu batzuetan ere aritzen naiz ni eurengana joaten", adierazi du Ainhoa Barandiaranek, erabilera askotariko espazioko ile-apaintzaileak.