Aldaketa nagusia zaborraren tasek izango dute, eta, horren harira, honako hau adierazi du Dorleta Elkorobarrutiak, Leintz Gatzagako alkateak: "Konposta egiteagatik zegoen hobaria ezabatu egin dugu, eta hori egiteko arrazoiak honako hauek dira: konposta egiteagatik hobaria herritar guztiei aplikatzen zaie, nahiz eta hobariek portaera jakin bat saritu behar duten; konposta ez da modu egokian egiten eta herrian organikoaren edukiontzi marroia jartzea egokiagoa dela uste da, eta horregatik konpostagailuak kentzea planteatzen da".
Gainerako ordenantzetan, berriz, zenbateko guztiak eguneratu egin dituzte, baina egitura eta arauak berdintsu mantentzen dira, kasuan kasu. Horien artean, kirol instalazio berriak erabili nahi dituztenek ordaindu beharreko prezioak ere azpimarratu dituzte.
Kirol instalazioetako prezioak
Udalaren kirol instalazioak erabiltzeko ere ezarri dituzte prezioak. Horien artean dago gimnasio berria erabiltzeko urteko kuotaren prezioa. Hain zuzen ere, 100 eurokoa izango da, eta giltzak, berriz, 15 euroko prezioa izango du.