Irailaren 6an, zapatua, 17:00etan, bigantxak izango dira Leintz Gatzagako andramaixen egitarauaren barruan. Urte asko dela izaten ziren herriko festetan, baina, urte luzez antolatu gabe, proposamena mahai gainean jarri, egiteko aukerak aztertu, eta Leintz Gatzagako Udalak antolatzea erabaki du. Bigantxak Iñigo Almortza bergararrak eramango ditu, eta San Migel enparantzara aterako dituzte; hesituta egongo da eremua, nahiz eta eskailerak libre utziko dituzten.
Ohitura berreskuratzen
"Duela 30 urte inguru irtengo ziren azkenengo aldiz bigantxak Gatzagan. Ondoren, Gorriti-rekin haurrendako saioak izan dira hainbat urtetan. Herri harresitua izanda, dena itxita, kalean izaten ziren bigantxak; oraingoan, lekua aztertu eta egingarri ikusten dugu, leku polita da", adierazi du Iñigo Almortzak. Bergarako zezenzaleak gaineratu duenez, Eskoriatzan, Antzuolan… herri askotan berreskuratzen ari da. Hala, Gatzagako saioa ere arrakastatsua izango dela aurreikusten dugu".