Ikasturte bukaera izanda, Leintz Gatzagako Antzerki Eskolako haurrek egubakoitz honetan antzezlan bat plazaratuko dute herritarren aurrean. Lapurreta Nesken Institutuan izenburupean, San Miguel enparantzan, hau da, Herriko Plazan taularatuko dute lana, 18:30ean, eta euria bada pilotalekuan egingo dutela adierazi dute.
Gorputzaren erabilera ardatz
Leintz Gatzagako Antzerki Eskolako taldearen bigarren ikasturtea da honako hau, eta, iaz moduan, kurtsoa amaitzeko antzezlana prestatu dute. Debagoieneko Antzerki Plataformako eta Gatzagako Antzerki Eskolako irakasle Eider Sanz pozik dago saioek emandakoarekin eta gaurko prestatutakoarekin: "Aurten, sentsazioekin eta askotariko materialekin aritu gara lanean. Gorputza izan da gure erreminta nagusia, eta horrek eskaintzen dizkigun aukerak ikertzen aritu gara. Aurretik existitzen zen testu anonimo bat hartu dugu eta gure egin dugu, bertsionatuz, eta gaur aurkeztuko dugu jendaurrean".