Giro onean igaro dute goiza bertaratutakoek. Antolatutako jardueren artean, bertako produktuen azoka, mendi ibilaldi gidatua, Gatz Museoko bisita gidatua, Jakoba Errekondoren hitzaldia eta Iñaki Palaciosen kontzertua izan dira.
Eguerdian, ekitaldi berezia egin dute Bateko Kopa iturriaren inguruan, 300 urte bete baititu ondareak . Gatz Eguna baliatu dute iturriari omenaldia egiteko, hiru koplaz osatutako bertso baten bidez. Horrez gain, bertsoaren azken kopla idatzita duen plaka jarri diote iturriari.
Dorleta Elkorobarrutia alkatea oso pozik agertu da egunak izan duen bilakaerarekin: “Beldurra genuen, eguraldiak Leintz Gatzaga bezalako herri batean asko baldintzatu zezakeelako eguna, baina oso balorazio ona egiten dugu”. Era berean, eskertuta azaldu da, inguruko herrietatik gerturatutako herritarrekin.
