Debagoiena 2030ekin elkarlanean, Mankomunitate osoan egingo den Mugikortasun Diagnostikoan parte hartuko du Gatzagako Udalak. Lehenengo pausoa Debagoieneko herri txikien mugikortasun galdetegian batutako emaitzak azaleratzea izango da. Herritarrek dituzten ohiturak eta euren beharrak identifikatuko dituzte, eta, horiek ardatz, azterketa faseari ekingo diote, egon daitezkeen ekarpen berriekin batera.
Ikertu, hobetzeko
Gatzagak duen errealitatea ezagutu eta gero, gaian sakonduko dute. "D2030ek udalerri txikien mugikortasunaren errealitatearen inguruko ikerketa egin nahi du, eta ondorio batzuk atera, egingarri diren proposamen batzuk zerrendatzeko", adierazi du Dorleta Elkorobarrutiak, Leintz Gatzagako alkateak.
