Aurten, 09:00etan batuko dira, Gatzagako Markole enparantzan –goiko parkean–, Gabon kantak abestera joan nahi duten herritarrak. "Aurten, alderantziz egingo dugu; herrigunean arituko gara, lehenbizi, kantuan eta Udalak atera dituen egutegiak banatzen, etxez etxe, eta, ondoren, autobusa hartu eta baserriz baserri arituko gara", adierazi du Ainhoa Barandiaranek, Gurel Guraso Elkarteko kideak. Aurrez zehaztutako ibilbidea egin ostean, herrigunera bueltatuko dira eta kantuan jarraituko dute. Amaitzeko, berriz, salda eta txistorra izango da parte-hartzaileentzat Toki-Eder elkartean.
Egutegian, herria zerutik eta ateak
Leintz Gatzagako Udalak etxez etxe banatuko duen 2025eko egutegia bi argazkirekin dago osatuta. Horietako bat Juan Luis Zabala gatzagarrarena da –herriko arkuena–; bigarren argazkia, berriz, drone batetik ateratako herri osoko irudia da.
