Herrian kultura jarduera gehien antolatzen dituen taldea da Gurel guraso elkartea. Zuhaitz landaketa, Gatz Eguneko pintxo salmenta, Gaba Baltza eta amaitu berri dituzten udalekuak, esaterako. Haur txikiak dituzten herritarrak hainbatean batzen dira kultura jarduerak antolatzeko, eta belaunaldi berrien beharra dagoela diote.
"Haur txikiak ditugun gurasoak elkartzen gara, eta haur gehiagorik ezean jende gutxiago batuko gara. Gure txikien aisialdia eta heziketa hobetzeko urteroko ekintzez gain, plangintza berria ere prestatzear gaude. Datorren ikasturtean ikastaroren bat antolatu nahiko genuke…", dio Ainhoa Barandiaranek, Gurel guraso elkarteko kideak.
Gurelen bilakaera
Amaia Arzelus Gurel guraso elkarteko kideak hauxe gaineratu du: "Herria bizirik mantentzeko ekintzak antolatzen jarraituko dugu. Gure ezaugarri bat da adin tarte askotariko haurrak batzen direla, elkar ere zainduz, eta hori bultzatzea dagokigu ".
