Arrasateko Arotz plazatik 10:30ean irten zuten sei lagunek, eta Aretxabaleta zeharkatu ondoren, Eskoriatzara iritsitakoan, beste hiruk egin zuten bat taldearekin. Kuatruena ingurura ailegatutakoan Gatz Bideari heldu zioten eta udazken goiz ederrarekin gozatu zuten ibilbidean aurrera egin ahala. Gorosarri landetxean hamaiketakoa eskaini zieten ohi legez, eta indarrak berreskuratuta aurrera egin zuten.
Uste baino lehen iritsi ziren Gatzagara, 12:30ak pasatxoan, 14,5 kilometroko ibilbidea osatuta. Dorletako baselizatik pasatuta, herrira jo zuten, eta han San Milixan eguneko giroan murgildu ziren. Eguna borobildu zuten Maulanda jatetxean bazkalduta.
Taldeko kideak pozik agertu dira egunak emandakoarekin eta urtero taldetxo bat elkartu izanarekin. Era berean, gogorarazi dute edonorentzat dituztela ateak zabalik: "Lagunartean, lasterka eginez, egun polita pasa gura duen edonorentzat". Hala, Eugenio Otsoak eta Mariatxen Arantzabalek sustatutako ekimenak ez du etenik izango.
